හොඳයි, මට පේනවා ඔබලා බිඳපු බිත්තර. ඒත් කෝ ඔබලාගේ ඔම්ලට් එක ?

ස්ටාලින් යුගයේ සෝවියට් රුසියාව ගැන මෙම ප්‍රසිද්ධ ප්‍රකාශය කරන්නේ පනයිත් ඉස්ත්‍රාති. රුමේනියානු ජාතික ලේඛකයෙකු වූ පනයිත් ඉස්ත්‍රාති සෝවියට් විප්ලවයට දැඩි සහයක් දැක්වූ ප්‍රංශයේ “Les Amis de l’URSS” නම් සංවිධානයේ සභාපතිවරයා ද විය. එම නිසාම සෝවියට් සංගමයේ ආරාධනයෙන් සෝවියට් රුසියාවේ සංචාරය කරමින් වසර හයක් ගතකරන්නට ද ඔහුට අවස්ථාව හිමිවිය. මෙම සංචාරයට ඔහු සමඟ ඔහුගේ මිතුරෙකු වූ ග්‍රීක ලේඛක නිකොස් කසන්සාකිස් සහ ඔහුගේ බිරිඳ ද එක්විය. නිකොස් කසන්සාකිස් ගේ සොර්බා නම් ග්‍රීකයා කෘතියේ එක් තැනක පනයිත් ඉස්ත්‍රාති ගැන සඳහන් කර තිබේ. එමෙන්ම කසන්සාකිස් ට දැඩි ලෙස බලපෑම් කළ ලේඛකයෙකු මෙන්ම මිතුරෙකු ලෙස ඉස්ත්‍රාති සැලකේ.
ස්ටාලින්ගේ පාලනය යටතේ තිබූ සෝවියට් රුසියාවේ මෙම සංචාරය අතරතුර විශාල වශයෙන් සැකකරුවන් පරීක්ෂා කරමින්, ඝාතනය කරමින්, අතුරුදන් කරමින් තිබූ යුගයක, සතුරන්ට එරෙහිව ප්‍රචණ්ඩත්වයේ අවශ්‍යතාව ගැන ඔහුට ඒත්තු ගන්වන්නට උත්සාහකරමින් එක් සෝවියට් නියෝජිතයෙකු පවසා සිටින්නේ, “බිත්තර නොකඩා ඔබට ඔම්ලට් කන්නට බැරි බව ය.”

එයට පිළිතුරු දෙමින් පනයිත් පවසන්නේ, “හොඳයි, මට පේනවා බිඳපු බිත්තර. ඒත් කෝ ඔබලගේ ඔම්ලට එක,” යනුවෙනි. එම සමස්ත ප්‍රකාශය තුළ ඔහු සෝවියට් දේශයේදී අත්විඳි බොහෝ දේවල් ගැබ්ව තිබේ. ස්ලැවොයි ජිජැක් පවා වරෙක මෙම ප්‍රකාශය උපුටාගෙන,

IMF එක විසින් පනවන ලද කප්පාදු පියවර ගැන ද අපි එයම කිව යුතුය. “අපි මුළු යුරෝපය පුරාම බිත්තර කඩනවා, ඒත් කෝ ඔබලා අපිට පොරොන්දු වූ ඔම්ලට් එක,” යනුවෙන් පැවසීමට ග්‍රීකයන්ට පූර්ණ අයිතියක් ඇත යනුවෙන් ප්‍රකාශයක් කරයි.
පනයිත් ස්ත්‍රාති හැමවිටම වැඩකරන ජනතාවගේ පැත්තේ සිටිගත් ලේඛකයෙකි. ඔහුට සිටගත්තේ රෙජීම හෝ පාලකයන් පසුපස නොවේ. විශේෂයෙන්ම ඔහු මේ සංචාරය අළලා ලියන ලද සංචාරක සටහන් වල රුසියානු ජනතාව ගේ දුක, පීඩාව නිවැරදිව ලියන්නට අසමත් රුසියානු ලේඛකයන් දිගින් දිගටම විවේචනය කළේය. ස්ටාලින්ගේ දඬු අඬුවට අසුවූ රුසියානු ලේඛකයෝ තමන්ගේ සැබෑ පිටපත් සඟවා තැබූ බව නොරහසකි.

පනයිත් ඉස්ත්‍රාති මෙන්ම ජපන් කොමියුනිස්ට් ක්‍රියාකාරිනියක වූ මියමොටෝ යුරිකෝ ද මෙම කාලසීමාවේ සෝවියට් රුසියාවේ සංචාරය කරමින් ලියූ සටහන් වල ද ඉස්ත්‍රාති ට සමාන අදහස් දකින්නට ලැබෙයි. විශේෂත්වය වන්නේ මේ දෙදෙනාම සෝවියට් පාලනයේ ආරාධනය මත එහි ගිය අයවළුන් වීම ය. කෙසේ වුවද සෝවියට් දේශයෙන් පිට සිටි ලිවීම නිසා ඔවුන්ට සත්‍යය ලිවීමට හැකියාව ලැබුනා විය යුතුය. ලංකාව තුල මේ ලේඛක ලේඛිකාවන් ගැන කිසිදු සඳහනක් නැත්තේ අර ප්‍රොපගැන්ඩාවට ලියැවුන පොත් හෝ අධිනිශ්චය වූ සමහර රුසියානු කෘති නිසා විය හැකි ය.

– රශ්මික මණ්ඩාවල

Leave A Reply

Your email address will not be published.

2 × 5 =