“වසංගතයට අමතරව උතුරේ ජනතාවගේ දුප්පත්කම වැඩිවෙලා, මැර කල්ලි, ගණිකා නිවාස වැඩිවෙලා”

කොවිඩ් වසංගතය හමුවේ පීඩාවට පත්ව සිටින උතුරේ ජනතාව මෙම වසංගතයට පෙර සිටම දරිද්‍රතාවයෙන් බැට කන බවද මේ නිසා ආණ්ඩුව මැදිහත්වී වහාම එම ජනතාවගේ අහිංසක ඉල්ලීම් ලබාදිය යුතු බව රාමලිංගම් චන්ද්‍රසේකර් අවධාරණය කරයි.

ජනතා විමුක්ති පෙරමුණේ ඊයේ(14) පැවැති මාධ්‍ය හමුවකදී එම පක්ෂයේ මධ්‍යම කමිටු සාමාජික රාමලිංගම් චන්ද්‍රසේකර් මේ බව අවධාරණය කළේය
එහිදී ඔහු පැවසූ සම්පූර්ණ අදහස් මෙසේය.

“කොවිඞ් වසංගතය හමුවේ ආණ්ඩුව උතුරු ප්‍රදේශයේ ජනතාව ගැන යොමු කර තිබෙන අවධානය කිසිසේත්ම ප්‍රමාණවත් නැහැ. වසංගතයට අමතරව දුප්පත්කම විශාල වශයෙන් වැඩිවී තිබෙනවා. රටේම දුප්පත්කම 6.7%ක් හැටියට තිබුණත් කිලිනොච්චියේ 10.9%ක් වෙනවා. දුප්පත්කම නිසා පිඩාවට පත්වන ජනතාව කොවිඞ් වසංගතය හමුවේ බලවත් පීඩාවට පත්වී සිටිනවා. ඒ වගේම සමාජ ආර්ථික ප්‍රශ්න නිසා යාපනය දිස්ත්‍රික්කයේ මැර කණ්ඩායම් පවා බිහිවී තිබෙනවා. ඔවුන් මැඩ පැවැත්වීමට පොලීසිය අසමත් වී තිබෙනවා. මේ නිසා උතුරු ප්‍රදේශයේ ජනතාව නැවත වටයකින් භීතියට පත්වී සිටිනවා. තව පැත්තකින් ආර්ථික අගහිඟකම් නිසා ගණිකා වෘත්තිය වැඩි වී තිබෙනාව. සමහර ගණිකා මඩම්වලට පොලිසිය ආරක්‍ෂාව දෙනාවද කියන ප්‍රශ්නයත් ජනතාවට තිබෙනවා. මේ නිසා මේ ජාවාරම් පිටුපස දේශපාලන බලවේග තිබෙන බව ජනතාවට පැහැදිලි වී තිබෙනවා.

කොරෝනාව විසින් ජනතාවගේ දරිද්‍රතාවය වැඩිකර තිබුණත් පොදුවේ ඊට වඩා ව්‍යසනයක් බවට දුප්පත්කම පත්වී ඇති බව තහවුරු වෙනවා. කාන්තා ගෘහ මූලිකාවන් සිටින පවුල් 28,000ක්, ආබාධිත 7,000ක් වගේ පිරිසක් උතුරේ ඉන්නවා. නමුත් මෙ අයට කොරෝනා සහනාධාර පවා ලැබෙන්නේ නැහැ. නමුත් ආණ්ඩුවේ මැති ඇමතිවරුන්ගේ පුතුන් උතුරට ගිහින් මාධ්‍ය සංදර්ශන පවත්වනවා. පසුගිය අගෝස්තු මාසයේදී කොළඹට පැමිණි 20ක් පරීක්‍ෂාවට ලක්කළා. වැලිඔය ප්‍රදේශය කෙවිඞ්වලින් තොර බවට මුලදී කීවා. නමුත් එහි සිට කොළඹට ගෙන ආ සිවිල් ආරක්‍ෂක භටයන්ගෙන් 10කට කොරෝනා ආසාදනය වෙලා. ඊට පස්සේ 10 දෙනෙක් අහඹු ලෙස පරීක්‍ෂාවට ලක් කෙරුණා. ඒ 10ම ආසාදිතයෝ. මේ ආකාරයට සිවිල් ආරක්‍ෂක භටයන් විශාල පිරිසක් කොළඹ රාජකාරිවලට යොදවා ආසාදිතයින් බවට පත්වුණාම නැවත වැලිඔයට ගිහිල්ලා දානවා. දුප්පත් ගොවියන් සහ වෙනත් අඩු ආදායම් ලබන පවුල්වල සාමාජිකයන් මේ ආකාරයෙන් සිවිල් ආරක්‍ෂකයන් හැටියට රාජකාරී කිරීම තුළ කොවිඞ් ආසාදනය වීමෙන් ඔවුන්ගේ මුළු පවුල්වලටම රෝගය වැලඳීමේ අනතුරක් තියෙනවා. මේ නිසා වැලිඔය ප්‍රදේශයේ සිවිල් ආරක්‍ෂක නිලධාරීන් එයින් පිට ප්‍රදේශවල රාජකාරීවලට නොයොදන ලෙස ජනතාව ඉල්ලා සිටිනවා. මේ වැනි අහිංසක ඉල්ලීම් විශාල ප්‍රමාණයක් උතුරු නැගෙනහිර ජනතාවට තිබෙනවා. ඒ ඉල්ලීම් හෝ ඉටුකර දෙන ලෙස අපි ආණ්ඩුවට අවධාරණය කරනවා.”

Leave A Reply

Your email address will not be published.

12 + fifteen =