15 හැවිරිදි දැරිය අපයෝජනය; නාවික හමුදාවට අනුයුක්ත දොස්තරත් දැලේ

අවුරුදු 15 ක දැරියක් අන්තර්ජාලය හරහා ලිංගික කටයුතුවලට අලෙවි කිරීමේ සිද්ධිය සම්බන්ධයෙන් තවත් පුද්ගලයින් දෙදෙනෙක් අද දිනයේ අත්අඩංගුවට ගෙන තිබේ.

අත්අඩංගුවට ගෙන ඇත්තේ වයස අවුරුදු 33ක පුද්ගලයෙක් සහ නාවික හමුදාවට අනුයුක්ත විශේෂඥ වෛද්‍යවරයෙකි.

බණ්ඩාරගම ප්‍රදේශයේදී අත්අඩංගුවට ගෙන ඇති මොහු වැලිසර නාවික රෝහලේ විශේෂඥ වෛද්‍යවරයකු ලෙස කටයුතු කරන්නෙකි.

අන්තර්ජාලය හරහා එම දැරියව ලබාගෙන අපයෝජනය කර ඇති බවට ඔහුට චෝදනා එල්ල වී තිබේ. ඔහු එලෙස ඇයව දෙවරක් අපයෝජනය කර ඇති බව වාර්තා වේ.

එම පුද්ගලයින් දෙදෙනා ද සමග මෙම සිද්ධියට අදාළව අත්අඩංගුවට ගත් සැකකරුවන් සංඛ්‍යාව 34 දක්වා ඉහළ ගිය බව පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ පවසයි.

ගල්කිස්ස ප්‍රදේශයේ වයස අවුරුදු 15ක එම දැරියව ලිංගික අපයෝජනය කිරීම සම්බන්ධයෙන් පසුගිය ජුනි මස 7 වැනිදා ගල්කිස්ස පොලීසිය මගින් ප්‍රථමයෙන් විමර්ශන ආරම්භ කර තිබුණි.

සිද්ධිය සම්බන්ධයෙන් මේ වනවිට අත්අඩංගුවට ගෙන සිටින පුද්ගලයින් අතර දැරියව විවිධ පාර්ශ්වයන් වෙත ලබාදුන් පුද්ගලයින්, ප්‍රවාහනය කළ පුද්ගලයින්, කාමර පහසුකම් ලබාදුන් පුද්ගලයින්, දැරියව අපයෝජනයට ලක් කළ පුද්ගලයින්, දැරියව අලෙවි කිරීමට වෙළෙඳ දැන්වීම් නිර්මාණය කළ පුද්ගලයින්, වෙබ් අඩවි පවත්වාගෙන ගිය පුද්ගලයින් ද වෙයි.

පොලීසිය සඳහන් කළේ මෙම සිද්ධියට අමතරව මේ ආකාරයෙන් දැරියන් අලෙවි කරන අනෙකුත් වෙබ් අඩවි සම්බන්ධයෙන් ද පූර්ණ විමර්ශනයක් ආරම්භ කිරීමට සූදානම් බවය. ඊයේ දිනයේදී පැවැති විශේෂ සාකච්ඡාවකදී එම තීරණය ගෙන තිබේ.

Leave A Reply

Your email address will not be published.

twenty − eleven =