කොච්චිකඩේ දේවස්ථානයේ දී ‘යුක්තිය වෙනුවෙන්’ නන්දාමාලනී ගයන ගීතය එළිදක්වයි

පාස්කු ඉරුදින ප්‍රහාරය සිදුවී අදට (21) දෙවසරක් සම්පූර්ණ වීම සිහිකිරීම පිණිස රටේ සියලු කතෝලික දේවස්ථානවලදී අද දේවමෙහෙයන් හා සැමරුම් වැඩසටහන් සංවිධානය කර ඇති අතර මැල්කම් කාදිනල් රංජිත් කොළඹ අගරදගුරුතුමන්ගේ ප්‍රධානත්වයෙන් කොච්චිකඩේ දේවස්ථානයේ පැවති ප්‍රධාන දේවමෙහෙය පැවැත්විණි.
මේ අතර කොච්චිකඩේ දේවස්ථානයේ දී මහාචාර්ය සුනිල් ආරියරත්න විසින් රචිත, ආචාර්ය රෝහණ වීරසිංහයන් විසින් සංගීතය මුසු කළ විශාරද නන්දා මාලිනිය විසින් ගයන සැමරුම් ගීතය එළිදැක්වීම ද මෙහිදී සිදු විය.
පාස්කු ප්‍රහාරයට වසර දෙකක් සම්පූර්න වන විටත් එම අපරාධකරුවන් නීතිය හමුවට ඉදිරිපත් කිරීමට අපොහොසත්වීම සම්බන්ධයෙන් මහාචාර්ය සුනිල් ආරියරත්න, ආචාර්ය නන්දාමාලනී සහ ආචාර්ය රෝහණ වීරසිංහ එක්වී ගීතයක් නිර්මාණය කර තිබේ.

යුක්තිය වෙනුවෙන්

දිව්‍ය පූජා යාගයට ආ බැති මතුන්
කැටුව ආ මව්පියන් දරුනන් අහිමි වී
සදා සෝගිනි කඳක දැවෙමින් වැලපෙමින්
රටම අන්දය ගොළුය බිහිරිය මන්ද ඒ

කොහිද යුක්තිය…
කොහිද ධර්මය…
කොහිද නීතිය විමසනූ…

අන්තවාදී අධම නොමිනිස් කැලකගේ
මානසික බල වියරුවේදී ගොදුරුවූ
අහින්සකයන් නාමයෙන් ඇස් හැර බලවු
දඬුවමක් විඳ ඇද්ද කිසිවෙක් ඔවුන්ගෙන්

කොහිද යුක්තිය…
කොහිද ධර්මය…
කොහිද නීතිය විමසනූ…

සුසානය මැද සොහාන් කඳු මත වැලපෙතී
ස්වාමිවරු සිය බිරිඳ දරුවන් අහිමි වූ
කුරුරි ඝාතක කැලම නිදහස් සුව විඳී
නොලැබ දඬුවම් රටට පිටුපා සිනාසී

කොහිද යුක්තිය…
කොහිද ධර්මය…
කොහිද නීතිය විමසනූ…

නොරැවටෙමු අපි වංචනික රස මුසු බසින්
ඇවිද යමු අපි නැගෙන බාදක බිඳලමින්
පිබිද එමු අපි දෙව් මැදුරුවල අළු මතින්
අවිදිවෙමු අපි නිහඬ නිද්‍රා සිහිනයෙන්

කොහිද යුක්තිය…
කොහිද ධර්මය…
කොහිද නීතිය විමසනූ…

 

Leave A Reply

Your email address will not be published.

five × 2 =