දැන් ඉතින් වෙන කුමක් කරන්නද?

ලෝකයේ විවිධ ඩොලර් වර්ග භාවිත කළ ද, එක්සත් ජනපද ඩොලරයට ලෝකය පුරා හිමි වන්නේ විශේෂිත තත්ත්වයකි. මෙහි ප්‍රතිඵලයක් ලෙස ලෝකයේ වැඩිපුර ගනුදෙනු සටහන් වන්නේ එක්සත් ජනපද ඩොලර්වලිනි. ලංකාව වැනි කුඩා රටකට එම නිසාම ඩොලර් මඟහැර යා නොහැකි තැනට තල්ලු වී ඇත්තේ, ලංකාවට අදාළ බොහෝ විදේශ ගනුදෙනු ඩොලර්වලින් සිදු වන නිසා ය.

වසර කිහිපයක් පුරා ශ්‍රී ලංකාවේ අපනයන ආදායමෙන් 25%ක් පමණ තනි රටක් ලෙස එක්සත් ජනපදයෙන් ලැබෙන නිසා ලංකාවට ඩොලරයේ වැදගත්කම ප්‍රබල වී ඇත. රටක අපනයන දිශාව තනි රටක් වෙත යොමු වීමේ අවදානම දේශපාලනිකව අවබෝධ කර ගැනීම ඉතා වැදගත්ය. කෙසේ වෙතත්, ඩොලරය අපේ රටට වැදගත් වන්නේ අප රටෙහි සමස්ත ආර්ථිකය ඩොලරය තුළට කේන්ද්‍රගත වීම නිසා ය.

ලංකාවේ අපනයන, ආනයන, විදෙස් ණය, විදේශ සංචිත, විදේශ ආයෝජන යන ප්‍රධාන ආර්ථික සංරචක තීරණය වන්නේ ඩොලර් මත ය. ඒ අනුව අප රටේ ඉහත අංශවල වසර ගණනාවක් පුරා සිදු වන පරිහානිය විසින් ආර්ථිකය අර්බුදකාරී තත්ත්වයට පත් කර තිබේ. දැන් අපගේ ප්‍රධාන ආර්ථික ප්‍රශ්නය ඩොලර් හිඟකම වුවත්, එවැනි තත්ත්වයකට අපේ රට පත් කළ දේශපාලනය ගැන කතා නොකර ඩොලර් ගැන පමණක් කතා කිරීම ඇත්ත ප්‍රශ්නය යටගැසීමකි.

නිෂ්පාදන ආර්ථිකයක් බිහි නොකිරීම, විදේශ විනිමය ඉපැයීමට අසමත් වීම, ලබා ගත් ණය ඵලදායී ආයෝජනවලට යොමු නොකොට ඒවා සොරකම් කිරීම, දියුණු සහ ස්ථාවර සේවා ආර්ථිකයක් නිර්මාණය නොකිරීම ගැන සාකච්ඡා නොකොට ඩොලර් ප්‍රශ්නය ගැන පමණක් කතා කිරීමත්, එයට විසඳුම් සෙවීමත් දේශපාලන තක්කඩිකමකි. එහෙත්, දැන් සමාජයේ ජන මනස යොමු කිරීමට උත්සාහ ගන්නේ මෙම ඩොලර් අර්බුදය දෙසට මිස ඒ යට සැඟ වී ඇති දේශපාලනය දෙසට නොවේ.

ඒ අනුව මේ මොහොතේ රට මුහුණ දී තිබෙන සියලු අර්බුදවලට විසඳුම ඩොලර් සෙවීම බවට වන මතයක්, අදහසක් සමාජගත කරමින් සිටිනු ලැබේ. කිසි දිනක ඩොලරයේ මුදල් නෝට්ටුවක් නොදුටු, එයින් ගනුදෙනු නොකළ ඈත ගම් දනව්වල මිනිසුන් පවා ඩොලර් ගැන කතා කරන තත්ත්වයට පත් කර තිබේ. රටට කීර්තියක් අත් කර දිය හැකි යම් ක්ෂේත්‍රයක දක්ෂතාවක් ඇති කලාකරුවකු, ක්‍රීඩකයකු, විද්වතකු බිහි වුවහොත්, කතා කරන්නේ ඔහුගේ දක්ෂතාව ගැන නොව ඔහුට රටට කොතරම් ඩොලර් ඉපැයිය හැකි ද යන්නයි.

පාලකයෝ සියලු සම්බන්ධතා ඩොලර්වලට හිලවු කරමින් සිටිති. එසේ සිතීමට සමාජයට බල කරමින් සිටිති. ආනයන සීමා කිරීමත්, පොහොර ගැටලුවත්, බඩු මිල ඉහළ යාමත්, ගුරු අරගලයත්, කොරෝනා පැතිරීමත් ඩොලරයට යට කරමින් සිටිති. දේශීය සම්පත් කුණුකොල්ලයට විකිණීම සැදැහැ සිතින් ඉවසාගත යුත්තේ මේ ඩොලර් යකා දෙස බලා ය. අත යට කෙරෙන විදේශ ගනුදෙනු, පැනමා ලියැවිලි, මහ දවල් කරන මහා පරිමාණ වංචා ගැන කතා නොකළ යුත්තේ, ඩොලර් අර්බුදය නිසා ය. වසර ගණනක් තිස්සේ වසා ඇති පාසල් සහ කඩාවැටී ඇති අධ්‍යාපනය ගැන, කොරෝනා වසංගතය ගැන වගේ වගක් නැති පාලකයන්ගේ දිනපතා ප්‍රධාන මාතෘකාව බවට පත්ව ඇත්තේ ඩොලර් අර්බුදයයි.

සමාජයේ කතිකාව බවට ආණ්ඩුව ඩොලර් අර්බුදය පත් කරමින් සිටින්නේ සැබෑ අර්බුදය යටගැසීමට ය. එනිසාම “මේ ඩොලර් අර්බුදයට ඔබලාගේ විසඳුම් මොනවා දැ”යි ප්‍රශ්න කරන අයගෙන් පෙරළා ප්‍රශ්න කළ යුත්තේ, “මේ තට්ටුමාරු දේශපාලනයට ඔබලාගේ විසඳුම් මොනවා ද” යන්නයි●

සුනිල් කුමාර ගමගේ
Leave A Reply

Your email address will not be published.

sixteen + 13 =