වැටුණු වැසි මැද දඹුල්ල වයිකිංග්ස් ජය ගනියි

දඹුල්ල වයිකිංග්ස් සහ කැන්ඩි ටස්කර්ස් අතර අද (28) පැවති තරගයෙන් ඩක්වර්ත් ලුවිස් න්‍යායට අනුව ලකුණු 4 ක ජයක් වාර්තා කිරීමට දඹුල්ල වයිකිංග්ස් කණ්ඩායම සමත්විය. ඒ අනුව කැන්ඩි ටස්කර්ස් කණ්ඩායම පිට පිටම දෙවැනි වතාවටත් පරාජයට පත් වීය. “ලංකා ප්‍රිමියර් ලීග්” පන්දුවාර විස්සයි-20 ලීග් ක්‍රිකට් තරගාවලිය යටතේ වර්ෂාවෙන් බාධා පැමිණි පළමු තරගය බවට මෙම තරගය පත්වුණි.

කඩුලු 4 ක් දැවී ලකුණු 195 ක් ලබා දඹුල්ල වයිකිංග්ස් ලබා දුන් ඉලක්කය හඹා ගිය කැන්ඩි ටස්කර්ස් පිතිකරුවන්ට වර්ෂාව හේතුවෙන් තරගය නිමා කරද්දී ජයග්‍රහණය සඳහා ලකුණු 88 ක් ලබාගත යුතුව තිබුණි. එහෙත් වර්ෂාව තදින් ඇද හැලෙනවිට ඔවුන් රැස්කර ගැනීමට සමත්ව සිටියේ ලකුණු 84 ක් පමණි.

පළමුව පිටියට පිවිසි කුසල් පෙරේරා කළින්ම දැවී ගිය නමුත් පෙර තරගයේදී අර්ධ ශතකයක් ලද රාමනුල්ලා ගුර්බාස් පන්දු 18 කදී වේගවත් ලකුණු 30 ක් ලබා ගනිමින් ආරම්භය වේගවත් කළේය. පස්වැනි පන්දුවාරය වන තෙක්ම කැන්ඩි ටස්කර්ස් පිල ඉදිරියෙන් පසු වුවද මාලින්ද පුෂ්පකුමාර විසින් ගර්බාස්වද දවා ගැනීම නිසා තරගය යළිත් දෙපිළටම විවෘත විය.

එහෙත් සිය සටන අත් නොහළ කුසල් මෙන්ඩිස් කමිඳු මෙන්ඩිස් සමඟ එක්ව අවශ්‍ය වේගය රඳවා ගනිමින් පන්දුවට පහර දුන් නමුත් තරගය නතර කිරීමට පන්දු 6 කට පෙර ෂෙහාන් මධුශංකගේ පන්දුවකට එල්ල කරන ලද පහර මිඩ් විකට්හි පන්දු රැකි පුලින තරංග විසින් රැක ගත්තේය. ඒ සමඟ ටස්කර්ස් පිල අත තිබූ වාසිය දඹුල්ල වයිකිංග්ස් පිල උදුරා ගත්තේය.

මෙතෙක් පැවැති තරග 2 දීම දෙවැනියට පන්දුවට පහර දුන් කණ්ඩායම් ජයග්‍රහණ වාර්තා කිරීමට සමත්වූ හෙයින් එහි වාසිය ලබා ගැනීමේ අරමුණු කොට කාසියේ වාසිය දිනූ කැන්ඩි ටස්කර්ස් නායක කුසල් පෙරේරා ප්‍රථමයෙන් පන්දු යැවීම තෝරා ගත්තේය.

පළමු පන්දුවාර 10 අවසනදී ලකුණු 70 ක් ලබා ලකුණු 150 සීමාව ඉක්මවා ලීමට තරම් දඹුල්ල වයිකිංග්ස් පිල අවදානම් තත්ත්වයක පසුවිය. එසේ වුවත් නායක දසුන් ශානක සහ සමිත් පටෙල් එක්ව සිව්වැනි කඩුල්ල වෙනුවෙන් රැස් කරන ලද ලකුණු 127 ක සම්බන්ධතාවය 200 ට ආසන්න ලකුණු සංඛ්‍යාවක් කරා යෑමේ අවස්ථාව උදාවිය.

දසුන් ශානක

කඩුලු 2 කට ලකුණු 64 ක් දැවී සිටියදී පිටියට එක්වූ  දකුණත් පිතිකරු යුගලය එම සම්බන්ධතාවය සඳහා පන්දු 64 ක් පමණක් රැස් කළේය. එහිදී වැඩිම දායකත්වයක් දැක්වූ දසුන් පන්දු 37 කදී ලකුණු 73 ක් රැස් කරන ලද්දේ තම ඉනිම හයේ පහර 4 ක් සහ හතරේ පහර 8 කින් සරසා ගනිමිනි. ඔහුට අනගි සහායක් ලබා දුන් පටෙල් ද පන්දු 38 කදී හයේ පහර 2 ක් සහ හතරේ පහර 5 ක් සමඟ ලකුණු 58 ක් ලබා ගත්තේය.

20 වැනි පන්දුවාරයේදී මොවුන් දෙදෙනාම දැවී ගියේ සිය වගකීම් ඉටු කරමින් කැන්ඩි ටස්කර්ස් කණ්ඩායමට එරෙහිව අවසන් පන්දු වාර 10 දී ලකුණු 127 ක් ලකුණු පුවරුවට එක් කරමිනි. එයට 18 වැනි පන්දුවාරය යැවූ කවිෂ්ක අංජුලට එල්ල කරන ලද ලකුණු 22 ද අයත් විය. පන්දු යැවීමෙන් අසේල ගුණරත්න සහ නවීන් උල්හක් කඩුලු 2 බැගින් බිඳ හෙළීමට සමත්වූහ.

Leave A Reply

Your email address will not be published.

2 × 3 =