මනම්පිටිය වැලි මාෆියාව- එදා මෛත්‍රිපාල අද රොෂාන් රණසිංහ

දේශපාලන බලවතුන්ගේ මාෆියාවක් බවට පත්වී ඇති මහවැලි ගඟේ මනම්පිටියේ වැලි නිධිය අතින් අතට මාරුවෙන බූදලයක් බවට පත්වී ඇති බවත් එය නතර කිරීමට ජනාධිපතිවරයා ප්‍රමුඛ රජය වහා පියවර ගතයුතුයැයි මනම්පිටිය වැලි නිධිය සුරැකීමේ සංවිධාන එකමුතුව ඊයේ (13) මාධ්‍ය හමුවක් කැඳවමින් කියා සිටියේය.

දිඹුලාගල ප්‍රාද්ශීය සභාවට බදු වශයෙන් වර්ෂයකට ලැබිය යුතු රුපියල් කෝටි දෙකකට වැඩි මුදලක් මේ වනවිට නොලැබී යන බවද දිඹුලාගල,මනම්පිටිය ප්‍රදේශවල වැලි ගොඩ දැමීම ජීවිකාව කරගත් විශාල පිරිසකට ජීවත්වීමට ක්‍රමයක් නැතැයි ද පවසයි.

මනම්පිටිය වැලි නිධිය සුරැකීමේ සංවිධාන එකමුතුවේ කැඳවුම්කරු ටී.බී.සරත්ගේ ප්‍රධානත්වයෙන් මනම්පිටියේදී මේ මාධ්‍ය හමුව පැවැත්විණි.

එහිදී අදහස් දැක්වූ ටී.බී.සරත් මෙලෙස පවසයි,

“වසර15ක විතර කාලය තුල මනම්පිටි වැලි ගොඩ දැමීමේ ස්ථානය දේශපාලන බලවතුන්ගේ ගොදුරක් බවට පත්වෙලා. බලය ගන්න සෑම දේශපාලන බලවතෙක් ගේම ගොදුරක් තමයි මේ වැලි නිධිය. මේආණ්ඩුව ආණ්ඩුව බලයට එනකොට පොලොන්නරුවේ ක්‍රියාකාරීව මැදිහත් වෙච්ච දේශපාලන අධිකාරිය අද මේක ගොදුරක් බවට, ඉල්ලමක් බවට පත්කරගෙන තිබෙනවා. මේකට ප්‍රධාන වශයෙන්ම වගකියන්න ඕන අද පොලොන්නරුව දිස්ත්‍රික්කයේ පොදුජන පෙරමුණේ දේශපාලනයට නායකත්වය දෙන රොෂාන් රණසිංහ මහත්තයා. ඔවුන් මේ වැලි මාෆියාව නතර කරන්න ඕන.

මොකද?ඔවුන් එවකට හිටපු ජනාධිපති තුමාගේ වැලි මාෆියාව නතර කරන්න තමයි බලය ඉල්ලුවේ. හැබැයි එදා තිබුණු මාෆියාව අද දෙගුණයකින් වැඩි වෙච්ච එකක් බවට පරිවර්තනය වෙලා තියෙනවා. වැලි ටික තියෙනවා.ගොඩදාන මිනිස්සු ඉන්නවා.බෝට්ටු තියෙනවා.සේවකයේ ඉන්නවා.ගොඩදාන එක කළමනාකරණය කරන්න සමාගමක් තියෙනවා.

ඒ වැලි ටික නියමිත පරිදි ප්‍රවාහනය කරන ලොරි රථ සංගම්වලට ක්‍රමානුකූලව ලබාදීම මෙතැන කරන්න තියෙන්නේ. හැබැයි එහෙම ලබා දෙනවා වෙනුවට මේකට දේශපානඥයො පැනලා වළං කඬේට පැනපු ගොන්නු වගේ මේක විනාශ කරනවා.මේ වැලි නිධිය ආශ්‍රිතව ප්‍රවානහය කරන ලොරි රථ 2000කට ආසන්න ප්‍රමාණයක් තිබෙනවා.හැබැයි වැලි නිධියෙන් දවසකට ගොඩදාන්න පුළුවන්කම තියෙන්නේ වැලි ලොරි 200-250ක් අතර ප්‍රමාණයකටසමාගමට තියෙන්නේ මේක ටෝකන් ක්‍රමයකට බෙදල දෙන එක.නමුත් හැමදාම කරන්නේ තමන්ගේ ලොරි 75ක් 100ක් ඇතුලු කරන එක.

මේ දේශපාලන බලවතුන් එක ලොරියකින් රුපියල් 5000ක් අය කරනවා.කොළඹට ගියත් පොලොන්නරුවට ගියත් ඒ රුපියල් . 5000 එකතු වෙනවා.වැලි මිළදී ගන්න කෙනා තමයි මේ රුපියල් 5000 ගෙවන්න ඕන. ඒ ලොරි 75ට 100ට හැමදාම වැලි හම්බවෙනවා.

සමාගමට පිටින් තැරැව්කාරයෝ මේ මුදල් එකතු කරන්නේ. අනෙක් ලොරිවලට සතියකට එකක් නෑ. මේ වැලි නිධියෙන් අහිංසක විදියට ජීවත් වුණු 2000 කට 3000කට එයින් ජීවත් වෙන්න නොදී තමන්ගේ දේශපාලන ගොදුරක් බවට පත් කර ගත්ත මේ ක්‍රියාවලිය හරි අසාධාරණයි. 2015 බලයට පත්වුණු ආණ්ඩුව, ඒ ආණ්ඩුවෙ හිටපු දේශපාලන අධිකාරිය, දේශපාන බලවත්තු මේ වැලි නිධිය මේ ආකාරයට හොරකම් කලා, වංචාකලා, දූෂණය කලා.

දේශපාලන නායකයන්ගේ ගෝලයෝ, තරැව්කාරයෝ තමයි ලාභ ඉපැයුවේ පැත්තකට වෙලා ඉඳගෙන. අපි රොෂාන් රණසිංහ මහත්තයාගෙන් අහනවා ඇයි මේ මාෆියාවට දේශපාලන නායකත්වය දෙන්නේ. ජනාධිපතිතුමා ප්‍රමුඛ රජයට අපි අවධාරණය කරනවා මෙය නතර කිරිමට හා පියවර ගතයුතුයි කියලා. එය නතර කරනතුරු මේ වැලි නිධිය සුරැකීමේ ව්‍යාපාරය තුල අපි දිගින් දිගටම ඉන්නවා.”

මනම්පිටිය වැලි නිධිය සුරැකීමේ සංවිධානයේ සභාපති සංජීව බන්දුසේන,දිඹුලාගල ප්‍රාදේශීය සභාවේ ජනතා විමුක්ති පෙරමුණේ මන්ත්‍රී ගයාන් චතුරංග යන මහත්වරුද මෙහිදී අදහස් දැක්වූහ.

Leave A Reply

Your email address will not be published.

3 × 4 =